30 Maj, 2024
Tirana, Albania
Kryesore Lajme nga vendi

Albcontrol thotë se i kanë humbur ndërtesat

Kompania publike e menaxhimit të trafikut ajror, Albcontrol thotë se i kanë humbur dy ndërtesa. Dy objektet me numër pasurie 137/1 dhe 196/1, të cilat ishin në listën e aseteve të kompanisë dhe që sipas letrave ndodhen brenda territorit të aeroportit të Rinasit tani nuk ekzistojnë më.

“Shoqëria Albcontrol ka në pronësi dy ndërtesa brenda territorit të TIA-s. Bazuar në vendimin e asamblesë së aksionarit për përmirësimin/përditësimin e regjistrit të pasurive të paluajtshme, Albcontrol i është drejtuar me shkresë Bashkisë Krujë për ekzistencën e dy objekteve të sipërcituara. Bashkia Krujë në përgjigjen e kthyer me Akt Verifikimin e datës 12 tetor 2022, ka konstatuar se dy objektet me sipërfaqe 111 dhe 238 metra nuk ekzistojnë dhe aktualisht janë parcela bosh,” thuhet në raportin e audituesit ligjor për zvogëlimin e kapitalit të Albcontrol.

Pas zhdukjes pa lënë gjurmë të ndërtesave audituesit ligjor kanë zbritur vlerën e tyre nga kapitali i shoqërisë. Regjistri i pasurive të ndërmarrjeve shtetërore është një lëmsh kaotik, ku shumë prona të shtetit nuk janë të regjistruara në hipotekë. Por kjo është hera e parë në histori, që një ndërmarrjeje publike i humbasin ndërtesat. Zakonisht ato që humbasin në shtet janë paratë, por ka gjithmonë një herë të parë. Tani po treten dhe objektet.

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *