19 Prill, 2024
Tirana, Albania
Kryesore Lajme nga vendi

Bum të huajsh edhe në Prill, numri i turistëve u rrit me 53%

Shqipëria u vizitua nga mbi 614 mijë turistë të huaj më muajin Prill, çka konfirmon se vendi po hyn drejt një tjetër sezoni rekord turistik. Të dhënat zyrtare nga Ministria e Mjedisit tregojnë se krahasuar me Prillin e vitit të kaluar numri i shtetasve të huaj që kanë hyrë në Shqipëri u rrit me 53 për qind.

Si katërmujor, gjatë periudhës Janar-Prill 2023, Shqipëria është vizituar nga 1.68 milionë turistë të huaj. Kjo shifër është 57 për qind më e lartë se sa e njëjta periudhë e vitit të kaluar.

Në vitin 2022, Shqipëria u vizitua në total nga 7.5 milionë turistë të huaj, me një rritje prej 34 për qind krahasuar më vitin 2021. Pas bllokimit në vitin 2020 për shkak të pandemisë, industria e udhëtimeve dhe sektori i turizmit në Shqipëri po rigjallërohen me shpejtësi.

Organizata Botërore e Turizmit e renditi Shqipërinë si një nga vendet me ecurinë më të mirë të sektorit të turizmit. Sipas OBT, në tremujorin e parë të këti viti Shqipëria renditet si destinacioni i tretë më performancën më të mirë në botë për sektorin e turizmit, pas Katarit dhe Arabisë Saudite, duke shënuar rritje me 54 për qind të flukseve hyrëse turistike krahasuar me periudhën para pandemisë.

 

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *