Miniera e kromit në Bulqizë ka përfunduar si peng në bankë. Pronarët turq të minierës kanë vendosur kuotat e shoqërisë koncesionare Albchrome shpk si garanci për shlyerjen e një kredie të madhe të marrë nga banka Raiffeisen në Shqipëri.
Vendosja e minierës më të madhe në vend si peng në bankë është miratuar edhe nga Ministria e Infrastrukturës dhe Energjisë si autoriteti kontraktor i koncesionit.
“Ministria e Infrastrukturës dhe Energjisë pas takimeve të realizuara me përfaqësuesit tuaj dhe komunikimeve me institucionet e tjera shtetërore, në lidhje me këtë kërkesë, si dhe duke ju referuar parashikimeve përkatëse në marrëveshjen e koncesionit, shprehet parimisht dakord për vendosjen e barrës mbi kuotat e komponentit 1A, prej 20.6 milionë eurosh, që përbën vlerën për ristrukturimin e huasë ekzistuese të shoqërisë Albchrome,” thuhet në shkresën e MIE drejtuar shoqërisë Albchrome përmes të cilës miratohet vendosja e kuotave të saj si garanci në bankë.
Nuk dihet nëse Albchrome është detyruar nga vështirësitë financiare të kërkojë ristrukturimin e borxheve të vjetra në banka. Në vitin 2022 koncesionari i minierës së kromit në Bulqizë fitoi rreth 45 milionë euro para taksave, ndërsa bilanci i vitit të kaluar nuk është bërë ende publik.
Megjithatë vendosja e aseteve publike si garanci në banka i ekspozon ato përpara riskut të tjetërsimit dhe më pas falimentimit, siç ndodhi dhe me uzinën rafinimit të naftës në Ballsh.
