21 Shkurt, 2024
Tirana, Albania
Kryesore Lajme nga vendi

Qeveria i heq taksat hotelit të Gjikurisë në Himarë

Qeveria ka miratuar në mbledhjen e fundit statusin e veçantë “Investitor në strukturë akomoduese me 5 yje, status special” për White Roads Hotel shpk”. Vendimi i publikuar në fazen zyrtare të Këshillit të Ministrave saktëson se përgjegjëse për zbatimin e këtij vendimi është ministria përgjegjëse për turizmin.

White Roads Hotel është një investim 21 milionë euro, i cili parashikon ndërtimin e një hoteli me 190 dhoma, njësi për biznes & evente, sera me lule, ambiente sportive, hapësira për fëmijë, SPA, beach bar, kazino dhe njësi të tjera shërbimi në Gjilekë të Bashkisë Himarë. Ai zotërohet nga kompania Gjikuria, e cila ka nënshkruar kontratë me brand-in ndërkombëtar HYATT INTERNATIONAL LLC.

Fillimisht ky projekt u pajis me statusin investitor strategjik në prill të vitit të kaluar, ku qeveria i vuri në dispozicion 9 mijë metër katrorë tokë shtetërore me qira 1 euro. Por në gusht të këtij viti, vendimi për statusin investitor strategjik u ndryshua, pasi qeveria i dha kompanisë edhe 13 mijë metra katrorë tokë shtetërore shtesë duke e çuar në total mbi 22 mijë metra katrorë.

Hiqen taksat

Por çfarë përfiton në fakt projekti nga marrja e statusit special? Në vitin 2018 qeveria miratoi një paketë ligjore që synonte lehtësime taksash për kompanitë që do të angazhohenin në sjelljen e markave ndërkombëtare në fushën e hotelerisë.

Sipas ndryshimeve ligjore, hotelet me 4 dhe 5 yje nuk paguajnë tatimfitim për një periudhë 10-vjeçare nëse arrijnë që të përfitojnë statusin special.

Po kështu hotelet me status special përfitojnë shkallë të reduktuar të Tatimit mbi Vlerën e Shtuar 6 për qind për të gjitha shërbimet që ofrojnë. Kjo do të thotë se edhe bar-restorantet, saunat, pishinat, shelzonget dhe çdo aktivitet tjetër i këtyre hoteleve do të taksohet me vetëm 6 për qind TVSH nga 20 për qind që është norma zyrtare.

Ndërkohë që për hotelet e tjera, shkalla 6 për qind e TVSH-së aplikohet vetëm për shërbimin e fjetjes, por jo për restorantet dhe shërbimet e tjera.

Përtej kësaj, hotelet që marrin status special kanë edhe një tjetër lehtësi të madhe. Për të gjithë ata që kanë statusin special si hotele me pesë yje (brand name), taksa e infrastrukturës është zero.

Më parë, statusin special e ka përfituar dhe subjekti Green Coast e biznesmenit Samir Mane për projektin e hotelit në Palasë. Grupi BALFIN po zhvillon në Jug të vendit projektin për ndërtimin e të parit “MGallery hotel”, , pjesë e portofolit të grupit ndërkombëtar “Accor”. Punimet pritet të përfundojnë në vitin 2024 dhe hoteli do të ketë 118 dhoma dhe suita luksoze.

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *