30 Maj, 2024
Tirana, Albania
Kryesore Lajme nga vendi

Qeveria synon të marrë 500 mln euro borxh me Eurobond në qershor

Qeveria do të dalë sërish këtë vit në tregun financiar ndërkombëtar për të marrë 500 milionë euro borxh përmes emetimit të një eurobondi të ri. “Eurobondi (komponent i huasë afatgjatë në financimin e huaj) pritet të emetohet me një vlerë indikative prej 59.3 mld lekë (500 mln Euro),” thuhet në dokumentin zyrtar për Planin Vjetor të Huamarrjes 2023.

Burime nga Ministria e Financave thanë për Oligarkia.al se dalja në treg është planifikuar për në muajin qershor, por gjithmonë duke parë konjukturat e tregut.

Në buxhet e këtij viti, qeveria ka programuar të marrë 55 miliardë lekë ose rreth 495 milionë euro hua në total. Nga këto 200 milionë euro do të financohen nga humarrja në tregun e brendshëm përmes letrave me vlerë të qeverisë, ndërsa 300 milionë euro nga grantet, kreditë e buta dhe humarrja në tregun e lirë ndërkombëtar.

Por pse qeveria do të marrë 500 milionë euro borxh përmes eurobondit, kur kufiri i programuar I huamarrjes së jashtme është 300 milionë euro? Arsyeja është se qeveria ka menduar të shlyejë para kohë një pjesë të borxhit të marrë përmes eurobondit në vitin 2020, i cili maturohet pas dy vjetësh.

“Emetimi i ri është planifikuar të shoqërohet me një transaksion të riblerjes së një pjese të eurobondit që maturohet në vitin 2025, duke ulur kështu rrezikun e rifinancimit të atij viti,” sqarohet në Planin e Humarrjes.

Por Ministria e Financave thotë se në çdo rast, emetimi i Eurobondit si dhe blerja mbrapsht do zhvillohen vetëm nëse kushtet e tregut konsiderohen të favorshme, pra me norma të ulëta interesi. Në rast se emetimi nuk ndodh, MFE ka parashikuar një sërë alternativash të tjera financimi.

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *