15 Prill, 2024
Tirana, Albania
Kryesore Lajme nga vendi

Rama dhe Balluku japin 4 mln € të tjera nga paratë e qytetarëve për ujësjellësin e resorteve të Strategjikëve në Jug!

Para pak javësh, një Investitor Strategjik fitoi tenderin 7.5 milionë euro për ndërtimin e Ujësjellësit të Investitorëve Strategjikë në bregdetin e Jugut, duke filluar nga Palasa deri në Dhërmi. Ndërkohë, pasi trualli në atë zonë po falet dita-ditës dhe atje po ndërtohen fshatra të tëra turistikë, ku vlera e apartamenteve dhe vilave, është qindra mijëra euro, qeveria ka “menduar” sërish për ta, kësaj herë duke i shtuar edhe 4 milionë euro të tjera.

Kësaj herë është vënë në lëvizje Agjencia Kombëtare e Ujësjellës Kanalizimeve, një institucion në varësi direkte të zv.kryeministres Belinda Balluku, e cila i ka rrëmbyer bashkive edhe Drejtoritë e Ujësjellësve (deri tani s’ka marrë dot Ujësjellësin e Tiranës). Këto para’ do të shpenzohen që këta oligarkë dhe Strategjikë të kenë ujë të pijshëm, ndërsa ka informacione se uji po u merret fshatrave të zonës së Lumit të Vlorës.

Shpallja e tenderit nga Agjencia Kombëtare e Ujësjellës Kanalizime për ujësjellësin e Strategjikëve, faza II 

Sipas dokumentit të mësipërm, të siguruar nga redaksia e BoldNews.al, disa ditë më parë AKUK hapi tenderin me objekt “furnizimin me ujë të zonave bregdetare, zonat e investimit strategjik, Draleos, Drimadhës dhe Dhërmi të Bashkisë Himarë”. Bëhet fjalë për fazën II, atje ku kanë ndërtuar dhe po ndërtojnë të gjithë oligarkët, ku çmimi për m2 ka kapur majat.

Një investim për më të pasurit dhe për bizneset e tyre, ku njerëzit e thjeshtë, ata me rroga edhe të mira, pas disa vitesh, s’do të kenë mundësi të shkojnë dhe jo më të pushojnë në ato zona. Në dokument thuhet se vlera e këtij tenderi është 374.684.543 lekë, ose nëse do ti shtojmë edhe TVSh-në, shuma shkon në rreth 4.5 milionë euro. Një shumë e konsiderueshme, pasi vetëm disa muaj më parë u shpall fituesi i tenderit të fazës I me vlerë 7.5 milionë euro.

Në muajin janar 2024, redaksia e BoldNews.al botoi një investigim për tenderin e fazës së parë të ndërtimit të ujësjellësit. Në atë kohë ne e titulluam “Një Investitor Strategjik fiton tenderin e ujesjëllësit 7.5 mln € për Strategjikët!”. Fitues i tenderit doli një firmë e shpallur disa herë si investitore strategjike. Bëhet fjalë për firmën “Gjikuria”, e cila me dy vendime të Ramës ka marrë mijëra metra katrorë falas në zonën më të bukur të Shqipërisë për të ndërtuar resorte dhe vila private.

Por, e njëjta firmë, do të marrë po nga Rama edhe plot 7.5 milionë euro për të ndërtuar Ujësjellësin që do të furnizojë me ujë këto resorte, disa prej të cilave të ndërtuara nga vetë “Gjikuria”. “Një paradoks i madh, pasi përveçse shteti u ka dhënë me 1 euro truallin, tashmë po u bën edhe rrugë e ujësjellësa, me paratë e shqiptarëve të varfër. Madje, favorizohen të njëjta firma që fillimisht shpallen investitorë strategjike dhe më vonë fitues të tenderëve për bërjen e këtyre punëve publike” shkruante redaksia jonë.

Nga Boldnews

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *