20 Prill, 2024
Tirana, Albania
Lajme nga vendi

Tender sekret 4.5 mln euro për vilën qeveritare në Sauk

Qeveria dhe agjensitë në varësi të saj vazhdojnë të shpenzojë miliona euro të buxhetit në tendera sekretë. Këtë herë është Drejtoria e Shërbimeve Qeveritare, e cila ka shpenzuar 4.5 milionë euro me tender të fshehtë për rikonstruksionin e Vilës Qeveritare Nr 5.

E gjendur në ambientet e Pallatit të Brigadave, Vila nr 5 nisi të ndërtohej nga Ramiz Alia, por nuk u përfundua asnjëherë. Prej më shumë se 30 vjetësh ky objekt ka mbetur në formën e karabinasë dhe jashtë funksionit.

Por një muaj më parë, Drejtoria e Shërbimeve Qeveritare ka zhvilluar një tender sekret me fond limit 499 milionë lekë për rikonstruksionin e kësaj vile. Në garë morën pjesë dy kompani dhe fituese u shpall Ad-Star me ofertë 494 milionë lekë ose sa 99 për qind e fondit limit.

Nuk dihet se cili është plani i qeverisë për Vilën nr 5, pasi të gjitha dokumentat e tenderit janë sekrete. Por shpenzimi i 4.5 milionë eurove me tender të fshehtë për rikonstruksionin e një vile qeveritare ngre dyshime për shpërdorim të parave publike.

Aq më tepër kur autoriteti prokurues është Drejtoria e Shërbimeve Qeveritare, një nga institucionet publike më jo transparente në vend. E përfshirë në skandalin e fluturimeve charter të Kryeministrit, Drejtoria e Shërbimeve Qeveritare refuzoi të publilkojë fatutën financiare që taksapaguesit kanë paguar për avionin personal të kreut të qeverisë, pavaërsisht presionit të madh publik.

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *