30 Maj, 2024
Tirana, Albania
Investigim Kryesore

17 mln euro/ Si u trefishua tenderi i internetit për shtetin

Klodian Tomorri

Në 20 dhjetor të vitit të kaluar, pra vetëm 4 muaj më parë, Agjencia Kombëtare e Shoqërisë së Informacionit hapi një tender me vlerë 632 milionë lekë ose 5.5 milionë për të kontraktuar shërbimin e inernetit dhe lidhjen në rrjetin e brendshëm qeveritar të intranetit për 3 institucione publike.

Sipas dokumentave të tenderit, bëhej fjalë për Kadastrën, Tatimet dhe ISSH-në me të gjitha drejtoritë e tyre rajonale nëpër rrethe. Tenderi parashikonte që privati do t’i lidhte këtë institucione me rrjetin e brendshëm qeveritar të intranetit duke shtruar infrastrukturën përkatëse si do të siguronte shërbim internet me afat 24 muaj për këto institucione. Por tenderi befas u anulua. AKSHI e justifikoi anulimin tek Agjencia e Prokurimit Publik me arsyen se dokumentat e tenderit përmbanin gabime dhe mangësi të rëndësishme.

Këtë të mërkurë tenderi për shërbimin e internetit dhe intranetit u hap sërish. Por fondi limit është trefishuar, nga 5.5 milionë euro që ishte në tenderin e parë në 17.2 milionë euro tani. Por çfarë ndryshoi që kostoja u rrit me 3 herë ose 12 milionë euro në vetëm 4 muaj? Oligarkia.al krahasoi fjalë për fjalë dokumentat standart (DST) për të dy tenderat, pra si të atij që u shpall në dhjetor me kosto 5.5 milionë euro dhe të tenderit të ri me kosto 17.2 milionë euro.

Në tenderin e ri, përveç Kadastrës, Tatimeve dhe ISSH me të gjitha drejtoritë e tyre rajonale është shtuar edhe shërbimi i internetit për AKSHI-n. Duke qenë se AKSHI ja u ofron shërbimin e internetit shumë institucioneve shtetërore, rrjedhimisht shtohen edhe ato. Në total bëhet fjalë për 52 institucione duke filluar nga drejtoritë e shërbimit të transportit rrugor, IKMT, Shërbimin Gjeologjik etj.

Shumë prej këtyre institucioneve janë sakaq të lidhura në rrjetin e brendshëm qeveritar të intranetit dhe nuk kanë nevojë për investime infrastrukturore. Për to do të prokurohet thjesht shërbimi i internetit. Me pak fjalë, privati që do të fitojë këtë tender do të ketë monopolin e ofrimit të internetit thuajse për të gjithë shtetin.

Lëmsh kriteresh dhe datash

Sipër tabelës ku ka paraqitur institucionet për të cilat kërkohet shërbimi, AKSHI thotë se ky planifikim është i përafërt dhe orientues për palët në proces bazuar në nevojat që atom und të kenë. Pra më shumë se sa sigurimi i një shërbimi që i nevojitet shtetit, qëllimi i kësaj procedure duket se është të prokurojë një kontratë gjigande me shumë milionë euro.

Por nuk mbaron këtu. Oligarkia.al krahasoi dokumentat e termave të referencës për të dy tenderat. Të dy dokumentat e termave te referencës janë identike në çdo gërmë për të dy tenderat. Ndryshimi i vetëm është trefishimi i kostosë së tenderit nga 5.5 milionë euro në 17.2 milionë euro me një të rënë të lapsit.

Madje aq trashë është bërë sa që në tenderin e ri është lënë e njëjta datë përfundimi si në tenderin e dhjetorit. Pra në dokumenta kërkohet shërbimi i internetit për 24 muaj dhe data e përfundimit të kontratës është lënë 31 dhjetor 2024. Kjo pasi kanë harruar të ndryshojnë datat duke lënë të njëjtat data afatesh që ishin shpallur me tenderin e dhjetorit edhe pse tani jemi 4 muaj më pas dhe 24 muaj nga tani është prill 2025.

Ky i fundit është vetëm një nga tenderat e shumtë kontrovers të AKSHI-t. Vitet e fundit ky institucion është shndërruar në gropën më të madhe financiare të shtetit shqiptar, ku prokurohen shërbime me çmime deri në disa fish më shumë se tregu, siç ishte rasti i tenderit të SMS-ve, që u blenë më gati 10 lekë copa, kur bankat i marin me vetëm 1 lekë. Madje jo vetëm kaq, por AKSHI ka hyrë edhe në biznesin e blerjes së mediave, teksa shpërndan miliarda lekë për televizionet dhe portalet në mënyrë indirekte përmes kompanive të marketingut dhe PR.

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *