Kryetari i Bashkisë së Sarandës ka lëshuar alarmin se qyteti bregdetar nuk ka vend për të ndërtuar tualete publike. I pyetur nga këshilltarët në mbledhjen e Këshillit Bashkiak, Oltion Çaçi pranoi se situata është e vështirë.
“Eshtë e vërtetë, që ka probleme më hapësirat publike për të ndërtuar tualete të tjera, por do mundohemi të gjejmë disa mundësi për tualete portabël, të cilat u japin mundësi të gjithë turistëve të kenë hapësirat e tyre për të kryer nevojat, të cilat janë të domosdoshme,” deklaroi Çaçi.
Mungesa e hapësirave publike duke përfshirë parqet, këndet e fëmijëve dhe tualetet është një nga ankesat kryesore që turistët e huaj kanë për Sarandën.
