15 Prill, 2024
Tirana, Albania
Investigim Kryesore Lajme nga vendi

Agai i bregdetit/ KKT miraton dy resorte për Gjikurinë, kulla në Tiranë për Fushën, Papulin dhe çunat e Apexit

Këshilli Kombëtar i Territorit miratoi një ditë më parë lejet e ndërtimit për dy resorte të reja në bregdet. Të dy resortet kanë pronar fundor të njëjtin biznesmen, Florenc Gjikurinë.

Kompleksi rezidencial dhe turistik Delta Gardens do të ndërtohet në Palasë nga kompania White Roads Hotel. Kjo kompani zotërohet nga Gjikuria shpk dhe për këtë projekt ka marrë statusin e investitorit strategjik.

Në prill të vitit të kaluar, Komiteti i Investimeve Strategjike miratoi statusin e Investitorit Strategjik për subjektin White Roads Hotel. Sipas vendimit, kompania e zotëruar nga Milo dhe Florenc Gjikuria parashikonte të investonte 10 milionë euro për ndërtimin e një resorti me hotel dhe struktura akomoduese, që kishin një kapacitet prej 150 njësish.

Projekti shtrihej në një sipërfaqe prej 12 mijë metra katrorësh tokë në Gjilekë të Himarës. Vetë kompania Ëhite Roads Hotel zotëronte 3 mijë metër katrorë. Por bashkë me marrjen e statusit të investitorit strategjik, ajo përfitoi edhe 9 mijë metër katrorë tokë shtetërore kundrejt qirasë simbolike 1 euro.

Por me sa duket 12 mijë metrat nuk mjaftuan. Në qershor të këtij viti, Komiteti i Investimeve Strategjike e ndryshoi vendimin duke i shtuar kompanisë edhe 22 mijë metra të tjera tokë shtetërore me qira 1 euro.

Me pak fjalë, projekti Delta Gardens do të shtrihet në një sipërfaqe totale prej 33 mijë metra katrorë, nga të cilat kompania dispononte vet vetëm 3 mijë metra dhe mori nga shteti 30 mijë metra katrorë të tjera. Ky projekt shtrihet në një zonë të mbrojtur, që është Delta e Përroit të Palasë.

Resorti i dytë i miratuar nga KKT një ditë më parë quhet Village Square. Ky resort rezidencial dhe turistik do të ndërtohet në Dhërmi nga kompania Seaside Construction. Kjo kompani zotërohet nga tre aksionerë. Ata janë Florenc Gjikuria me 34 për qind dhe Bardhjus Bushaj e Erion Gina me 33 për qind.

I shndërruar në një nga ndërtuesit më të mëdhenj në bregdetin e Jugut, shpesh mbi toka shtetërore të marrë falas, fuqia e Gjikurisë duket se buron nga lidhjet e afërta me klanet mediatike të Tiranës. Por ndërsa biznesi i resorteve në bregdet, të cilat nisin si hotele por përfundojnë në vila dhe apartamente vazhdon me furi, ashtu vazhdon edhe biznesi i kullave në Tiranë.

Kullat

Një ditë më parë KKT miratoi lejet e ndërtimit apo zhvillimit për 7 kulla apo komplekse të reja në Tiranë. Mes tyre ishte kulla me formë të çuditshme tek kompleksi sportive Dajti, një kullë 33 kate për kompaninë Fusha, një tjetër me 19 kate tek liqeni për kompaninë TDT Partners e Daljan Avdiajt si dhe kulla e madhe e Papulit në rrugën e Kavajës.

Po kështu një ditë më parë, KKT ka mirtuar dhe ndryshimet e lejeve të ndërtimit për Marinën e Vlorës dhe resortin Gone Perivol të Artan Dulakut.

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *