Kompania franceze e burimeve të rinovueshme Voltalia deklaroi se termocentrali i saj diellor 140 MW në rajonin e Fierit në Shqipërinë jugperëndimore është afër përfundimit, dhe brenda pak javësh pritet të nisë prodhimin e energjisë .
Ndërtimi në këtë zonë, e njohur për rrezet e bollshme të diellit dhe e vendosur rreth një orë me makinë në jug të kryeqytetit, filloi në korrik 2022, tha Voltalia në një postim në mediat sociale.
Më herët në gusht, ofruesi kinez i rrjetit fotovoltaik Trina Solar tha se i kishte dorëzuar Voltalia-s të gjitha panelet diellore dydrejtimshe të nevojshme për ndërtimin e parkut diellor të Karavastasë.
Gjysma e energjisë së prodhuar do t’i shitet operatorit publik shqiptar të energjisë OSHEE sipas një marrëveshjeje 15-vjeçare të blerjes së energjisë, ndërsa pjesa tjetër do të furnizojë operatorët privatë nëpërmjet marrëveshjeve afatgjata, tha më herët Banka Evropiane për Rindërtim dhe Zhvillim (BERZH).
Investimi total në projektin e Karavastasë vlerësohet në 135 milionë euro (142 milionë dollarë) dhe po bashkëfinancohet nga BERZH, Korporata Financiare Ndërkombëtare (IFC), Intesa Sanpaolo Bank Albania, Privredna Banka Zagreb dhe nga burimet e veta të Voltalia.
Zhvilluesi francez i termocentralit po planifikon gjithashtu një park diellor 100 MW në zonën e Spitallës pranë qytetit bregdetar të Durrësit.
SeeNews
